Skip to main content

Aviisi Sermitsiaq ammasuunermut nersornaammik tunineqarpoq

Transparency International Greenland ammasuunermut nersornaasiisarnermik aallarniillunilu siullermeerluni nersornaasiivoq. Nersornaallu siullerpaaq aviisimut Sermitsiamut tunniunneqarpoq.

Ileqqorluttuliortarnermut peqquserluttarnermullu akiuiniaqatigiiffik Transparency International Greenland (TIG) ammasuunermut nersornaasiisarnermik aallarniillunilu siullermeerluni nersornaasiivoq. Nersornaasiinermut siunertaavoq inuiaqatigiitsinni ammanerusumik ingerlatsisoqarnissaanik suliniutilinnik peqquserlullunilu iluanaarniartarnerup kingunerluutigisinnaasaanik saqqummiussisartunik nersorinninneq.

Tusagaassiuutitigut nalunaaruteqarluni TIG nassuiaavoq naliliisartoqatigiinnik pilersitsisoqarsimasoq 2023-mi nersornaasigassamik toqqaaniarnermi, taakkulu tassaasut Inuk Lundblad, formand for TIG, tusagassiortoq Ilisimatusarfimmilu tusagassiortunngorniarfimmi pisortaq Naja Paulsen aammalu Anita Hoffer, ilisimasaqartutut TIG-mi ilaasortaq.

Qulaajaalluni tusagassiortarnertik pillugu nersorneqartut

Ataatsimiititaliap nersornaasigassatut innersuunneqartut misissorsimavaat, tamatumalu malitsigisaanik aviisi nersornaaserneqassasoq aalajangersimallutik.

- Aviisip nersornaatisineranut pissutaapput taassuma misissuilluni tusagassiornermik ingerlatsinera allaaserisaqartarneralu, soorlu aalisarnerup iluani pisassiissutaasartut aamma aatsitassarsiornermi piginnittunut tunngasut allaaserisallu allat inuiaqatigiinni pissutsit pingaarutillit pineqartillugit ersiqqissuliorlutik qulaajaasartut, TIG allappoq.

Nersornaat sulianut ataasiakkaanut qulaajaanermik tunngavilinnut tunniutaanngitsoq erseqqissaatigineqarpoq, aviisili Sermitsiaq nersorniarneqarpoq tamat akornanni inuiaqatigiinni ammasumik ingerlatsinerunissaq aqqutissiuullugu isummanik allanngortitsisariaqarnermik kaamisaalluni sulisitsimmat.

- Tusagassiortut nukittunertik takutippaat

TIG naapertorlugu qulaajaalluni tusagassiortoqartarnera tamat oqartussaaqataanerannik tunngavilimmik inuiaqatigiit ilagigaat aalajangeeqataasoq, aviisilu Ammasuunermut Nersornaammik tunineqarpoq sapiissuseqarmat inuiaqatigiinni inuttakitsunnguugaluartuni paasisaminik saqqummiussuinissaminut:

- Sermitsiami tusagassiortut nukittuffigaat paasiniaasarnertik oqallisigineqartunillu saqqummiisarnertik taamalu aamma takutillugu qanoq pingaaruteqartigisoq qujaasitsisarnissap inissaqartinnissaa, oqallitsitisartumik. Oqallinneq ammasumillu pissuseqarneq inuiaqatigiit isertortumik pissusilersortuunngitsut tunngavissaraat.

Nersornaatip allagartaa ammasumik ingerlatsinerup pissaanermik atornerluinermik qanitanillu salliutitsinermik akiuisuuneranik takussutissiivoq.

Pisortaq: Apeqqusersuilluni tusagassioriaaseq paarilluassavarput

Tusagassiuuteqarfiup pisortaa, Masaana Egede, aviisi Sermitsiap aaqqissuisuunera Dorthe Olsen peqatigalugu tallimanngornermi ualikkut nersornaammik tunniussisoqarnerani najuupput nersornaat tunniunneqarmat. Nersornaatisineq pillugu Masaana Egede nuannaarpoq:

- Soorunami nersorniarneqarneq nuannaarutigaarput, isumagalu malillugu aviisimi Sermitsiami aammalumi tusagassiuuteqarfimmi suleqataasut suliaminnut tunniusimanerannik ersersitsisoq. Apeqqusersuilluni tusagassioriaaseq inuiaqatigiinni uagutsitut ittuni paarilluassavarput, pingaaruteqarporlu nangittumik nuiaqatigiit soqutigisaat tunngavigalugit allaaserinnittarnerit qulaajaasarnerillu ingerlatiinnarnissaat, Masaana Egede nersornaammik tunniussisoqarneranut atatillugu oqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER