Skip to main content

Justus inuusuttunut inissiat pillugit: Kukkuneruvoq

Namminersorlutik Oqartussat Tasiilami inuusuttunut inissianik sanaartortitsipput, inissialli taakku imermut kuuffissuarnullu attavilerneqassanngillat, tamannalu Justus Hansenip naammaginngilluinnarpaa.

Demokraatit sinnerlugit Kommuneqarfik Sermersuumi kommunalbestyrelsimi ilaasortaq, Justus Hansen, tupaallappoq paasigamiuk inuusuttunut inissiat nutaat Tasiilami maanna sanaartorneqartut imermut kuuginnartumut attavilerneqassamaanngitsut aammalu anartarfii kuuffissuarnut ilanngunneqassanngitsut.

- Isumaqarpunga Namminersorlutik Oqartussat sanaartortitsigaangata tunngaviusumik piumasaqaataasariaqartoq imermut attaviliinissaq aammalu anartarfiit kuuffissuarnut attavilerneqarnissat. Issittumi sumiiffinni allani misissuisarnerit takutereernikuuaat imermik kuutsitseriaannaannginneq aammalu annittakkanik anartarfeqarneq nappaatinik assigiinngitsunik nalaataqartoqarnissaanut, soorlu tuberkulosemik tuniluuttoqalersinnaaneranik aarlerinaatit annertunerusut, Justus Hansen tusagaassiuutitigut nalunaarummini allappoq.

Kukkusumik aalajangerneq

- Tasiilami kuuffissualersuineq imermullu attavilersuineq ajunngilluinnartumik pilersorneqarneq ingerlavoq, taamaammat inissiat pineqartut attavilerneqannginnissaannik aalajangersimaneq kukkunerusutut isigivara, inissiammi taakku imeqassanngillat anittakkanillu anartarfeqartinneqassallutik, Justus Hansen erseqqissaavoq, taamaammallu Namminersorlutik Oqartussat kaammattorpai sanaartorneq taanna nalilersoqqinneqassasoq.

Justus Hansen isumaqarpoq aaqqiissut Namminersorlutik Oqartussat toqqarsimasaat ajornerullunilu najugaqartussanut akisunerusussaassasoq.

- Tassunga ilanngullugu maluginiagassaavoq, Tasiilami imermik pajuttuisumik biilersuaqanngilaq aammalu anartarfiit aninneqarneranni tankissaqanngillat, taanna tikkuaavoq.

Sanaartorneq uninngatinneqarallarpoq

Sanaartorneq taanna maanna uninngatinneqarallarpoq aatsaallu upernaaru aallarteqqinneqassamaarpoq. Mannalu tikillugu inissiat toqqavissaat kisimik anguneqarsimapput.

- Tamanna isumaqarpoq suli periarfissaqartoq imermut kuuffissuarnullu attaviliinissamut. Namminersorlutik Oqartussat sakkortuumik kaammattussavakka tamanna isumannaarneqaqqullugu, Sermersuumi politikeri kajumissaarivoq.

Sermitsiaq.AG-mit Namminersorlutik Oqartussat oqaaseqartinniarlugit attavigisaraluarpagut, maannamulli iluatsinngilaq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER