Kokainimik heroinimillu eqqusseriartoq ukiuni sisamani qaammatinilu arfinilinni pineqaatissinneqartoq
Angut 51-inik ukiulik kokainimik heroinimillu nunatsinnut eqqusseriarnini nassuerutigaa, Sermersuup Eqqartuussivianillu ingerlaannartumik pineqaatissinneqarluni. Angut tallimanngornermi eqqusseriarsimanini nassuerutigaa.
Angut 51-inik ukiulik heroinimik aamma kokainimik nunatsinnut eqqusseriarsimasutut Sermersuup Eqqartuussiviani pisuutinneqarpoq, ingerlaannartumillu pineqaatissinneqarluni ukiuni sisamani aamma qaammatini arfinilinni pineqaatissinneqarsimasunut inissiisarfimmiittussanngortinneqarluni.
Angut 51-inik ukiulik Danmarkimiit Nuummut tallimanngornermi 17. november angalasimasoq Kalaallit Nunaata Politiivisa tusagassiorfinnut nalunaaruteqarlutik allapput.
- Nuummut tikinnermi akitsuuserisunit paasineqarpoq kokainimik 150 gramimik iisisimasoq, taamatullu sikaritsit puuinut heroini 5 gramisut oqimaassusilik toqqorsimagaa, politiit ilisimatitsipput.
Nassuerutiginnittoq
Angut tigusarineqarpoq, Dronning Ingridillu Napparsimmavissuani skannertinnerni iineqarsimasunik timaani nassaartoqarpoq.
Suliaq nassuerutiginninnertut suliarineqarpoq. Angut inatsit tunngaviusoq aallaavigalugu eqqartuussivimmi arfininngornermi 18. november killisiorneqarami nassuerpoq eqqusseriarsimalluni. Suliaq taamaattumik nassuerutiginninnermik aallaaveqartunngorlugu eqqartuussivimmi ingerlaannartumik suliarineqarpoq.
Unnerluutigineqartut unnerluussisussaatitaasullu eqqartuussut akueraat. Angut tigummigallarneqassaaq, pineqaatissiissutip aallartinnissaata tungaanut.
Tunngaviusumik inatsit tunngavigalugu killisiunerup kingorna ingerlaannartumik pineqaatissiisarneq aatsaat siulliulinngilaq. Arnaq aamma angut alla ikiaroornartunik eqqusseriarsimanermik nassueruteqareernermi kingorna aamma taama pineqaatissinneqareersimapput.
Ernumanartoq
Ikiaroornartunik sakkortunerusunik eqqusseriartoqarsimanera Kalaallit Nunaata Politiivinit ernumanartoqartinneqarpoq. Ilisimaneqanngilarli ikiaroornartut sakkortunerit qanoq akulikitsingisumik eqqunniarneqartarnersut.
- Ikiaroornartut sakkortunerusut Kalaallit Nunaannut eqqunniarneqartartut amerliartortut malugisinnaavarput. Ernumanarpoq, inuiaqatigiinnummi annertuumik kingunerlussinnaavoq. Ullut 14-iunngillalluunniit qaangiupput angut alla hashimik aamma amfetaminimik eqqusseriaraluartoq tigusarineqarmat, aammalu ingerlaannartumik pineqaatissinneqarluni. Pisut taama ittut annertunerusumik eqqumaffigaagut, politiini paasiniaasartuni aqutsisoq, politikommissær Malik Sandgreen oqarpoq.
Inuunermut navialisitsisinnaasoq
Ikiaroornartunik eqqusseriartarneq inuunermut aarlerinartorsiortitsisinnaavoq. Inuit ikiaroornartumik eqqusseriarnerminni ajunaartut aamma arlaqalerput.
- Kalaallit Nunaannut ikiaroornartumik eqqusseriartut akitsuusersuisunit paasisaanissartik naatsorsuutigisariaqarpaat. Ikiaroornartumut tunngatillugu nunatsinni pineqaatissiisarnerit Danmarkimit pingasoriaatingajammik sakkortunerupput. Tamassuma takutippaa oqartussat ataatsimoortut, Kalaallit Nunaannut ikiaroornartumik eqqussuisoqannginnissaa anguniarlugu, iluatsissappallu suleqatigiittariaqarpugut, Malik Sandgreen oqarpoq.
Naatsorsuutit kingulliit takutippaat ulloq 20. november 2023 ilanngullugu, ikiaroornartunut tunngatillugu inatsimmik unioqqutitsisoqarsimanermut nalunaarutiginninnerit 509-usut. Siorna piffissap taamaasinerani nlunaarutiginninnerit 493-iupput.
Amerleriaat 3 procentiuvoq.
