Skip to main content

Múte: RAL-imi suut tamarmik qulaajarneqassapput

Royal Arctic Linemi ajortoqarsinnaaneranik malunniutit sakkortungaarmata, Namminersorlutik Oqartussat ingerlatseqatigiiffiutaa qanorpiaq ingerlanersoq paasiniarlugu, Múte B. Egede qulaajaasitsilerpoq.

Annaasaqarneq nunatta karsianut akisusinnaasoq naaperiuteqarfigisinnaajumallugu, Naalakkersuisut siulittaasuat Múte B. Egede RAL-imi diligence-procesimik taaneqartartumik aallartitsivoq. Tassa imaappoq,  ingerlatseqatigiiffiup aningaasaqarnera isumaqatigiissutillu assigiinngitsut avataaniit naatsorsueqqissaartarfiup misissoqqissaassavai.

- Ingerlatseqatigiiffimmi suut tamarmik qulaajarneqassapput, piffissaatillugu  – pisariaqassappat - qisuariarniassagatta. Aarlerinartoqarneranik qulliit ikittut amerlapput, taakkulu ajornartorsiuteqartoqarsinnaaneranik paasinarsititsipput, taamaattumik piffissaatillugu peqqissaartumik qisuariartoqartariaqarsimavoq, Múte B. Egede Sermitsiaq.AG-mut oqaluttuarpoq.

Akiitsut annertuut

RAL-ip akiitsui annertuut ilaatigut tikkuarpai, KNI-milu mamianartuliamut, ingerlatseqatigiiffiup akiliisinnaassusaanik nalornilersitsisumik missingersuutinik peqquserluttoqarsimaneranik paasisaasimasunut, innersuussilluni.

- KNI-mi mamianartuliaq eqqaamasinnaatillugu akisussaassuseqartumik iliuuseqarnissaq pisariaqarluinnarpoq, taamatut inissisimaqqinnissarput aarlerinartorsiutiginnginniassagatsigu, Múte B. Egede aalajangersumik oqarpoq.

Eimskipimik umiartoqatiginninneq isumassarsiatsialaanersoq isumassarsiatsialaannginnersorluunniit, aammalu ingerlatseqatigiiffik suleqatigiinnermik taamaatitseriarluni imminut napatikkuni pitsaanerussannginnersoq, B. Egedep isummerfigerusunngilaa. Umiarsuit angalanissaannut pilersaarusiat inissinniarneqartillugit Eimskip aalajangiisartuusoq, tamannalu kalaallit suliffeqarfiutaannut iluaqutissartaqanngitsoq, nipit isornartorsiuisut arlaleriarlutik tikkuarpaat.

PwC-p suliassaq tiguaa

- Ingerlatseqatigiiffimmi misissueqqissaarnerit qanoq takutitsissanersut utaqqissavarput, kingornalu suut aalajangiunneqassanersut paasiumaarparput, Múte B. Egede taama oqaaseqarpoq.

Ingerlatseqatigiiffik kukkunersiuinermik suliaqartoq PwC tassaavoq due diligence-mik suliaqartussaq. KNI-mi mamianartuliaq pillugu ingerlatseqatigiiffik kukkunersiuinermik suliaqartoq taanna aamma qulaajaasimavoq.

Múte B. Egede paasissutissiivoq, due diligence-mik suliaqarneq annertooq ukioq manna siusinnerusukkut aallartinneqartoq, 2024-llu ingerlanerani aatsaat naammassineqarnissaa naatsorsuutaasoq.

Eimskipimik suleqateqarneq ullormut oqaluuserisassani

- Inatsisartut nalunaarusiami piumasaqarnerat malillugu taassuma saniatigut RAL-ip kisermaassisuunera pillugu misissueqqissaarlutalu isummissaagut,  – ilaatigut Eimskipimik umiartoqatiginninneq pillugu. Ataatsimut isigalugu Royal Arctic Line pillugu suliarujussuit aallartisarneqarput, piffissarlu sivikitsoq atorlugu naammassiinnarneqarsinnaanngillat, Naalakkersuisut siulittaasuat naqissusiivoq.

Ukiuni arlalinni, Verner Hammekenillu aqutsisuunerani, kalaallit inuussutissarsiortut Sulisitsisut aqqutigalugit RAL-imut isornartorsiuingaatsiarput. Sulisitsisut misigisimapput atuisut pisariaqartitaat RAL-imiit tusaanngitsuusaarneqarsimasut. Verner Hammeken ingerlatseqatigiiffimmiikkunnaareerpoq.

RAL-imi pinerluttoqarneranik pasitsaassisoqarnerpa?

- Naamik, tamanna aallaavigineqanngilaq, Múte B. Egede aalajangersumik oqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER